Buot mánát dárbbašit ahte váhnemat aktiivvalaččat servet sin árgabeaivái. Váhnemat sáhttet positiivvalaččat searvat go beroštit das maid mánná bargá ja masa mánná liiko, guldalit maid mánná muitala, servet máná stoahkamii, ja oassálastet beaivválaš rutiinnaide, astoáiggedoaimmaide ja leavssuide. Mánnái lea buorre dovdat ahte váhnemat dihtet mo mánás lea ja dovdet su dovdduid, vásáhusaid ja fuolastemiid. Go váhnemat servet ja čájehit ipmárdusa, de mánná dovdá iežas oidnojuvvon ja vuhtiiváldojuvvon, ja mánná oažžu daid vuođđoeavttuid maid dárbbaša go galgá hukset buori oktavuođaid eará olbmuide. Positiivvalaš searvan mearkkaša maiddái ahte nagoda iežas bidjat máná sadjái, čuovvut máná álgagiid, bovdet máná ovttasbargui, suddjet máná, mánnái bidjat ahkái heivvolaš rájáid ja ráhkadit buori dovddolaš dili stoahkamii ja oahppamii.

Positiivvalaš searvan addá lagat oktavuođa váhnemiid ja mánáid gaskkas. Dát mielddisbuktá ahte mánná geavaha váhnemiid oadjebasvuođadoarjjan geaidda ohcala go dárbbaša doarjaga, lagasvuođa, jeđđehusa dahje movttiidahttima. Go mánát ja váhnemat huksejit buori oktavuođa, de sii juogadit iluid ja morrašiid ja ráhkisvuođadovddut nannejuvvojit.

Go lea hástaleaddji eallindilálašvuohta, de soaitá leat váttis bisuhit positiivvalaš oktavuođa mánnái. Mánát, geain leat láhttenváttisvuođat, ožžot dávjá negatiiva oktavuođa váhnemiiddáseaset. Váhnemiidda fas sáhttá leat váttis mánnái doalahit lagasvuođa ja čájehit beroštumi go váttisvuođat mánáin sturrot, ja váhnemat čájehit eanet ja eanet fuomášumi máná negatiiva daguide. Jus váhnen guovttos eaba nagot aktiivvalaččat searvat máná máilbmái, de joatkašuvvá negatiivvalaš ovdáneapmi. Šaddá stuorát gaska máná ja váhnemiid gaskii, lagasvuođa dovdu jávká, ja mánná ii šat ohcal váhnemiiddis. Dákkár dilálašvuođain lea buoremus sihke váhnemiidda ja mánnái ahte ohcá fágalaš veahki.

PMTO deháleamos ulbmil lea jorggihit dákkár negatiiva minstara, vai váhnemat ja mánná fas ožžot lagasvuođadovddu, ja psykologalaš báddi nannejuvvo. Buot váhnenmáhtolašvuođat, maiguin bargat PMTO:s, galget leat vuođđuduvvon váldoulbmilii – positiiva searvamii.