Nu guhká go mánát leat unnit, de ožžot birra jándora bearráigeahču ja čuovvoleami. Diehtit maid mánná bargá lea dehálaš go galgá suddjet máná ja addit sutnje oadjebasvuođa. Go mánná stuorrula, de dađistaga rievdá bearráigeahčču.

Bearráigeahču ja čuovvoleami sáhttá juohkit golmma oassái:

Áican. Váhnemat fertejit čuovvut mielde maid mánát dahket. Dát mearkkaša ahte galgá maiddái diehtit maid mánát barget go eai leat váhnemiiguin ovttas.

Oppalaš govva. Váhnemat fertejit diehtit gos mánná lea, geainna lea ovttas, maid dahká ja goas boahtá ruoktot.

Heiveheapmi. Váhnemat fertejit láhčit árgabeivviid nu ahte mánáin leat čielga rámmat, ja váhnemat fertejit servet mánáid eallimii dakkár vugiin mii ovddida positiivvalaš ovdáneami.

Dárbu bearráigehččui ja čuovvoleapmái lea maid čadnon máná ahkái ja dasa mo mánná doaibmá. Ođđa sosiála mediat leat addán váhnemiidda ođđa hástalusaid mat gáibidit liigečuovvoleami.

Mánáin, geain leat láhttenváttisvuođat, lea stuorát dárbu bearráigehččui ja čuovvoleapmái go eará mánáin. Sii dávjá dahket sávakeahtes daguid go dihtet ahte eai leat ollesolbmuid geahču vuolde. Sii ohcalit oktavuođa eará mánáiguin geain leat  láhttenváttisvuođat ja seahkanit dávjá hástaleaddji dilálašvuođaide. Mađi unnit váhnemat dihtet maid mánná dahká ja geaiguin son leat ovttas, dađi stuorát vejolašvuohta lea ahte mánná dahká sávakeahtes daguid. PMTO oahpaha váhnemiid ráhkadit oadjebas rámmaid máná čuovvoleapmái, ja rasttildit daid hástalusaid mat hehttejit buori bearráigeahču.